21 di Februari: “Dia di Lenga Materno”

ORANJESTAD—Ministerio di Cultura y Departamento di Cultura Aruba (DCA) ta recorda pueblo cu dia 21 di februari di tur aña ta Dia Internacional di Lenga Materno. Segun proclamacion di: The United Nation Education and Scientific Cultural Organization, (UNESCO).

Dia di Lenga Materno ta netamente pa stimula bon uzo di nos dushi idioma Papiamento  

den nos comunidad y stimula publicacionnan bou di nos escritornan local.  

DCA na momento di saca informacionnan cultural di tur loke ta publicacion, DCA ta haci su esfuerso pa percura pa tur ta den un bon idioma Papiamento. Publicacionnan manera “Nos Isla”, foyetonan di nos Simbolonan Nacional, manera nos Escudo, Himno y Bandera, Celebracion di San Juan, Dera Gay, Proyecto di Expedicion Rescate y tambe ‘Expedicion Rescate Naturalesa’ (ERN)cual ta trece informacionnan balioso di nos flora y fauna. Ora di duna relato den forma oficial DCA ta aplica e “Vocabulario Ortografico di Papiamento di 2009” – www.papiamento.aw. Den sentido general ta considera idioma, como e medio unificador di mas importante di un cultura. Idioma ta carga tur pensamento y experiencia humano, cultura y identidad. Idioma ta transferi cultura.

Mirando esaki DCA tin idioma Papiamento como un punto importante den su educacion cultural. Como cu ortografia tambe ta un simbolo sumamente importante, cu ta muestra di un propio identidad. Mester mustra cu e oficialisacion por crea aprecio y stimula nos pa, cu orguyo y amor, siña nos hendenan conoce e historia di nos idioma materno bon y promove e uzo corecto di papi’e y skirbie (papia- y skirbimento).

Durante e desaroyo di nos idioma materno Papiamento y como DCA bou auspicio di Ministerio di Cultura ta keda enfoca riba su retonan pa educa, promove, cuida y hacie mas conoci pa e bon uzo di nos Papiamento pa generacionnan cu ta bini.

Tambe DCA ta organisa e proyecto di “Arte di Palabra” (AdP) cu ta un competencia di conta cuenta y storia cortico, pa hoben di scol secundario y avansa. AdP Interinsular ta un competencia entre e ganadonan di Corsou, Boneiro y Aruba. DCA ta organisa AdP for di 2009, unda tur aña por mira e interes bou di nos hobennan, cu ta creciendo, pa nan participa.

Meta di e proyecto aki ta pa duna e hoben e oportunidad pa demostra nan creatividad literario; pa promove lesamento y skirbimento den nos idioma Papiamento; pa stimula publicacion di arte literario den Papiamento. Y tambe pa e hobennan di islanan A.B.C. tin un intercambio den nan cultura. E competencia di Arte di Palabra ta stimula e hobennan pa medio di nan poesia of cuenta cortico haci bon uzo di nos idioma Papiamento y enrikece nan conocemento di nos idioma. Cu e proyecto aki DCA ta traha hunto cu Fundacion Corector di Papiamento y scolnan avansa. 

DCA ta sostene Comision Celebracion Dianan Nacional  (CCDN) den cuadro di nos Dia Nacional, dia 18 di maart, organisando “Poeta di Patria”.

Fundacion Lanta Papiamento, (FLP), tambe ta un organisacion cu a ser institui pa preserva y salvaguardia e bon uzo di Papiamento.

DCA bou auspicio di ministerio di Cultura ta keda enfoca riba educa, promove, cuida y e bon uzo di nos Papiamento pa generacionnan cu ta bin. 

Masha Pabien Aruba awe 21 di februari, “Dia di Lenga Materno” Papiamento. 

Pa Mas Noticia Aruba Online News