Biografia di Franciscus Edwin Kock (Edwin)
Franciscus Edwin Kock a nace dia 10 di december 1951. Edwin ta originalmente di Jan Flemming, Santa Cruz. Edwin su aprecio pa e programa “People and Arts” a dun’e e nomber di cariño “People”, un nomber cu e pianista Cubano Gustavo Corrales a dun’e, bon conoci na Aruba y cu e otro Cubanonan a adopta. Su mama ta Ana Bella Nedd kende a nace dia 26 di juli 1933. Su tata (dfm) ta Mateo Efigenio Kock, miho conoci como Fenchie kende a nace dia 25 di november 1925. Edwin su tata, Fenchie, tabata gusta musica di guitara, specialmente di trio, y Edwin a hereda su pasion pa musica y guitara en particular. Edwin a lanta cerca su wela Federica Kock. Edwin ta e mayor di shete ruman homber parti di mama y un mas parti di tata. Edwin tin tres yiu di su prome matrimonio cu Lila Richardson, dos yiu muhe y un yiu homber: Roshim naci 2 di october 1978, Julise naci 4 di juli 1981 y Josanne naci 8 di november 1985. E famia aki tabata hopi involucra cu coro di misa, festival di mucha y a yuda diferente scol cu e parti musical pa comunion y tambe a aporta cantando coro na Festival di Tumba di mucha y hende grandi den e temporada di carnaval. Na 1996 cu ayudo di UNOCA y Land Aruba Edwin a dicidi di supera su mes y a bay haci un estudio di ‘Direccion Coral’ na e Instituto Superior de Arte na Havana, Cuba y aki el a topa su di dos casa, Mayra Kock-Garrido, un specialista di coro.
Segun Edwin e bida artistico a nifica un cambio den su bida y su manera di wak e arte musical
E desaroyo y profundisacion di su preparacion musical a nifica un cambio den su bida y tambe di su manera di wak e arte musical, na unda studia, practica y prepara ta e yabinan pa exito y no e fama superficial y farandulero cu bo ta wak hopi na Aruba.
E bida artistico
Edwin su tata Fenchie a inspir’e hopi pa musica. Fenchie tabata gusta musica Mexicano, trio, musica Cubano y Latino Americano te musica clasico. El a sigui curso di guitara cerca Harold Hopmans y Rosarito Hart na Dakota. Edwin a ricibi su prome lesnan di guitara di su tata. Su tata a siñ’e algun akkoord pa por compaña entre otro bolero, pero toch su tata a dicidi pa Edwin tuma les na Cas di Cultura, esta Arubaanse Muziekschool. E tabata diesdos aña e tempo ey. E prome guitara cu su tata a dun’e tabata un guitara cu el a cumpra hopi barata. Pero ora el a cuminsa haya les, su tata a presta un guitara di concierto masha grandi mes di su maestro di guitara, esta Harold Hopmans y cu e guitara ey e tabata bay un biaha pa siman les di guitara na Cas di Cultura cu autobus. Na caminda tin ora e hendenan tabata bis’e cu e guitara ta mas grandi cu ne y e tabata haya ripara. Su di tres guitara a bin di un manera inespera, ora cu el a huy den e barco ‘Santa Sofia’ pa temor pa sota di su tata door cu el a keda sinta. Edwin a biaha den e barco ey pa Philadelphia, New York, New Port News, Republica Dominicana, Puerto Cabello y La Guaira. E marineronan despues di a conoce Edwin su historia y su amor pa guitara a bati cabes hunto y nan a regal’e $150,00 cu locual el a cumpra un guitara nobo na Photo Hanna ora el a regresa Aruba. Den su formacion musical na les di Cas di Cultura el a haya les di guitara di Erik Tchong durante un periodo cortico y despues pa basta tempo di Ben Schulte. Tambe Edwin a haya les di guitara
clasico di Paul Antkowiak y Willem Brink y les di teoria y solfeo di Michiel de Jong, tur tres docente Hulandes cu a bin Aruba via Sticusa. Edwin a haya les di piano tambe di Rik Elings y Hans Hermans. Den e repertorio cu Edwin a studia por menciona obra di compositor clasico renombra: Sor, Uhl, Tarrega, Bach, Lauro y areglo di e musico local Buchi Boekhoudt.
Den autobus pa bay Cas di Cultura e pasaheronan tabata bis’e cu e guitara ta mas grandi cu ne.
Dedicacion musical
Den pasado Edwin tabata toca den e grupo Tipico Arubano, dirigi pa Sr. Chinto Geerman, un grupo cu tabata toca na diferente actividad, manera San Juan y Dande. Tipico Arubano a competi varios biaha y a bay cu tur e premionan durante un di e biahanan ey, esta: Meng Maduro a sali Rey di Dande; ‘Mi Caha di Orgel’ composicion di Chinto a gana e premio di miho propio composicion y a conkista tambe e prome luga pa piesa tipico.
Edwin y Chinto Geerman, como duo di guitara, a toca tambe pa Prinses Magriet un wals cu yama ‘Naturalesa’ na Plaza Betico Croes. Su bida como docente a cuminsa ora tabata falta maestro den bario. Muziekschool a puntra Edwin si e kier a duna algun les despues di su trabou di Archief y el a bay di acuerdo pa duna algun les di guitara na Sagrado Curason na Savaneta, Kukwisa School na Pos Chikito y Scol di Arte na San Nicolas bou di guia di Señor Ben Schulte. Algo cu a destaca den su trabou como docente den e periodo aki tabata algun presentacion di su alumnonan, entre otro un conhunto di 24 guitara cu a interpreta un piesa di Fernando Sor, harmonisa pa cuater bos y un kinteto di guitara cu a toca pa Reina Beatrix na Scol di Arte, San Nicolas.
Na aña 1989 a traslada Edwin di Registratuur en Archief pa Instituto di Cultura y el a keda na disposicion di Stichting Arubaanse Muziekschool pa traha tempo completo dunando les di guitara clasico. Na aña 1984 Edwin a atende e seminario “Carrefour Mondial de la Guitare” na
Martinique. Aki el a atende diferente workshop di tecnica, interpretacion, repertorio y estilo di guitara clasico. Edwin a participa aki tambe den un workshop dirigi y supervisa pa Leo Brouwer tocando un duo di Sor hunto cu Chinto Geerman. Den e mesun festival aki el a toca den un dobel cuarteto dirigi pa e gran maestro Leo Brouwer cu guitaristan famoso, manera Luis Quintero, Ivan Rijos, Paul Century, Guanchez.
Edwin a dicidi di huy den un barco cu tabata cla pa sali. E barco a sali y
Edwin tabata na bordo sin ningun hende tabata sa!
Ritmo y estilo musical
Edwin a dedica mas bien na e musica clasico. E tabata toca hopi piesa di Sor, di Alfred Uhl, un of dos piesa di Bach y tambe di Lauro. E tabata toca ‘El Negrito’, ‘La Negra’ y algun areglo di wals, por ehempel di Buchi Boekhoudt. Edwin tabata toca tambe un piesa di Buchi cu yama ‘Rosemary’ y tambe el a dedica hopi tempo na compaña coro na Pos Chikito riba su guitara, cu Albi Navas riba flauta.
Edwin y e canto coral
Na 1997 Edwin a cuminsa traha cu hopi dedicacion cu e coro Grupo Alegre di e Parokia di Santa Cruz. El a cuminsa duna les di tecnica vocal pa siña e coristanan canta den diferente bos y amplia nan repertorio pa asina yuda hisa e nivel. Bou di guia di Edwin e coro aki tabata canta na misa casi tur siman. Tambe e coro tabata canta misa di Pasco, a haci programa di television, comunion, casamento, entiero etc. Cu e fin di amplia su conocemento di direccion di coro Edwin a solicita pa un beca di estudio na Cuba. Na januari 1996 a otorg’e e beca anhela pa studia direccion coral na e Instituto Superior de Arte na Habana, Cuba. E curiculo di e estudio aki tabata encera: tecnica di direccion di coro, piano, harmonia, solfeo, practica cu coro, morfologia y tecnica vocal. Na december 1996 el a culmina su curso exitosamente cu un recital dirigiendo e coro di e facultad di musica di Instituto Superior de Arte. E programa di e recital cu el a presenta tabata consisti di e siguiente obranan: Himno di Aruba, Mariposa (Danza), Mas Vale Trocar (Renacimiento Español), Jesus Joy of Men Desiring (Bach ) y Negro Spiritual Tradicional.
Na su regreso na Aruba, den compania di su casa Mayra Kock-Garrido, el a sigui traha na e desaroyo musical di e coro femenino Grupo Alegre di parokia di Santa Cruz y e hunto cu su casa a funda e coro Ars Nova.
E coro Ars Nova a representa e isla di Aruba na diferente festival internacional, esta na Corsou, Cuba, Spaña, Hulanda, Colombia, Peru y Ecuador.
Edwin su bida como docente a cuminsa ora tabata falta
maestro den bario
Grabacion realisa
Den pasado nan a graba un CD aki na Aruba mes, cu piesanan clasico, Latino Americano y algun piesa tipico den cua Doedel Sofia a toca cuarta. Ora nan a bay afo, di mes nan tabata haya grabacion di video di e organisadornan.
Acontecimento cu Edwin ta considera mas importante den e bida artistico
Importante pa Edwin ta un presentacion di dobel cuarteto cu nan tabatin na Martinique, principalmente e parti di guitara. Pero esunnan mas importante ta e presentacionnan na Hulanda y na Peru. E presentacion cu a impresiona y emociona Edwin masha hopi mes y cu a yen’e cu felicidad tabata esun na Hulanda caminda su yiunan tabata presente.
Importante tambe tabata e concierto di Pasco cu a tuma luga na 2014 na Cas di Cultura, organisa pa Ars Nova, cu un orkesta di diesun musico cu violin, viola, cello y contrabaho.
Sugerencia pa futuro generacion
Ta hopi importante pa cuminsa educa bo mes riba tereno di musica na un edad hoben. Den e curiculo di scol primario mester introduci un bon curiculo di enseñansa di musica cu docente specialisa. Tambe mester di atencion urgente pa formacion di profesional di diferente
instrumento, manera flauta, clarinet, saxofon, trompet, trombone etcetera pa por yena e bashi cu a crea di tanto aña sin un plan concreto pa desaroyo den e area aki. Inverti den e tereno di educacion musical, tanto general como profesional, mester ta un prioridad pa crea un pueblo berdaderamente culto.
