Subsidio Structural
Cuatro organisacion no gubernamental (NGO’s) cultural ta ricibi subsidio structural di gobierno. Desde e restructuracion di e maneho di subsidio di Aruba na aña 2016, Departamento di Cultura Aruba tin como e directorado di maneho cultural, e rol di vigila y evalua (control di contenido) na momento di otorga subsidio na e NGO’s aki cu ta resorta bou di Departamento di Cultura Aruba.
E cuatro NGO’s concerni ta: Union di Organisacionnan Cultural Arubano (UNOCA), Stichting Schouwburg Aruba (SSA), Stichting Arubaanse Muziekschool (AMS) y Fundacion Museo Arubano (FMA).
Den cooperacion cu e ‘Coordinatie Bureau Overheidssubsidies’ (CBOS), ta coordina e proceso di otorgamento di subsidio di produccion (output subsidie) na e cuatro NGO’s aki.
E evaluacion di contenido di e peticion pa subsidio ta a base di e cuadro di evaluacion di e maneho di funcionamento, e obhetivo di e ministerio y e traduccion di e maneho pa e producto y e prestacion logra (programa di exigencia).
E cuatro NGO’s ta co-ehecuta e Maneho Integral di Cultura di Aruba y ta responsabilisa nan mes den nan relato anual y e relato financiero na e minister encarga cu Cultura .
Otro NGO’s cultural, no ta ricibi subsidio structural di gobierno, pero ta ricibi ayudo facilitario y un ayudo financiero limita.
Fundacion Museo Arubano
Fundacion Museo Arubano (FMA) ta un organisacion cu ta agrupa varios museo di Aruba. Ta trata di e museonan: Museo Historico, Exposicion di Carnaval, Museo Industrial y Museo Comunitario. Actualmente solamente e producto ‘Bon Bini Festival’ di Museo Historico ta haya subsidio.
Fundacion Museo Arubano tin como meta principal preserva, mantencion y proteccion di monumento natural cultural y historico na Aruba den e sentido mas amplio di palabra. Mescos tambe pa promove e conocemento y interes di e monumentonan aki na e pueblo di Aruba en particular y otronan en general.
Stichting Arubaanse Muziekschool
Stichting Arubaanse Muziekschool (AMS), como e centro pa educacion musical, ta contribui na un formacion musical optimal pa pueblo di Aruba. Pa e motibo aki e elementonan, calidad, diversidad, participacion y servicio ta di un importancia primordial pa AMS.
UNOCA
UNOCA ta un fundacion cu ta pa stimula, apoya y promove arte y cultura na Aruba. E fundacion ta haci esaki principalmente door di duna subsidio na organisacion y instancia cu ta ocupa nan mes cu ehecucion di arte y cultura pa Nos Isla. Ademas fundacion UNOCA ta responsabel pa supervisa e uzo eficaz y eficiente di e fondonan di gobierno den e sector cultural.
Stichting Schouwburg Aruba
Stichting Schouwburg Aruba (SSA) ta un organisacion cu ta maneha Cas di Cultura (CdC) y cu ta e teatro nacional y centro cultural di Aruba. Na aña 1956 a funda SSA cu e meta pa lanta y mantene un edificio, na unda por desaroya y promove e bida cultural di e comunidad Arubano. E edificio ‘Cultureel Centrum’ a habri su portanan oficialmente na aña 1958. Mas despues a cambia su nomber pa ‘Cas di Cultura’.
Stichting Schouwburg Aruba tin e como meta pa maneha, mantene y explota un edificio completamente ekipa cu ta ofrece un plataforma na unda por sigui desaroya y stimula e bida cultural den e comunidad Arubano, den e sentido mas amplio di palabra. Esaki ta e curason di comunidad unda ta practica, organisa, expone y inverti tur expresion di arte y unda ta transmiti tur norma y balor cultural, particularmente na e generacion mas hoben.