Aruba conoce diferente fecha di Dia Nacional:
• Dia di Betico;
• Dia di Himno y Bandera;
• Dia di Rey;

Eventonan cultural special:

• Dia di San Juan ‘Dera Gay’;
• Sinterklaas;
• Frestival di Dande;

Dia di Betico

Dia di Betico riba 25 di januari, ta celebra un fiesta na memoria di señor Gilberto F. (Betico) Croes d.f.m, un lider politico cu a logra e “Status Aparte” na 1986. Cu e Status nobo aki, Aruba a ricibi su autonomia for di Antia Hulandes y a bira un entidad den e Reino Hulandes. Aruba tin awe su propio Parlamento, Cuerpo di Polis, Defensa Militar, Corte di Husticia, Moneda, Himno y Bandera.

Ta organisa e actividadnan oficial y protocolario riba di ‘Dia di Betico’ door di e Comision Celebracion Dianan Nacional (CCDN), cu apoyo di DCA.

Desde aña 1989, riba dia 25 di januari di tur aña, Aruba ta celebra Dia di Betico, un Dia Nacional. A scoge pa e fecha aki como cu ta e fecha di natalicio di e gran estadista Gilberto François (Betico) Croes.

Di e forma aki Aruba por duna Gilberto François Croes su homenahe y asina un y tur por keda recorda su lucha pa a logra Aruba su Status Aparte. E lucha aki a marca historia di Aruba.

Dia di Himno y Bandera

Dia di Himno y Bandera ta un Dia Nacional cu ta celebra tur aña riba 18 di maart. Dia 18 di maart, ta un dia historico y festivo na unda ta celebra nos “Status Aparte”, como tambe e creacion di e Himno y Bandera di Aruba. E ta un Dia Nacional, pasobra riba e fecha aki na aña 1948, durante ‘Mesa Rondo na Hulanda’, pa prome biaha a entrega un mocion na Su Mahestad Reina Juliana, cu ta boga pa autodeterminacion di e pueblo Arubano. E delegacion Arubano tabata bou di liderazgo di Shon A. Eman y 2147 Arubiano a firma e peticion aki. Y dia 18 di maart na aña 1976, durante e acto oficial organisa pa Gobierno Insular di Aruba, den Wilhelmina Stadion, pa proclamacion oficial di Nos Himno y Bandera, a hisa e Bandera di Aruba pa prome biaha y a toca e cantica ‘Aruba Dushi Tera’ como e Himno di Aruba. E celebracion aki ta un muestra di Ceremonia Protocolar y un manifestacion Cultural cu nos ta celebra tur aña riba Plaza Libertador Gilberto F. (Betico Croes) riba Vondellaan, Oranjestad. E dia aki oficialmente ta un dia liber y riba cual ta organisa actividadnan pa pueblo y otro festividadnan.

Dia di Rey

Dia Di Rey ta un Dia Nacional den henter Reino Hulandes, un dia festivo pa duna honor na su hefe di estado, Su Mahestad Rey Willem-Alexander. Den tur pais di Reino Hulandes ta celebra Dia di Rey riba dia 27 di april, e fecha natal di Rey Willem-Alexander. E dia aki oficialmente ta un dia liber y riba cual ta organisa actividadnan pa pueblo y otro festividadnan.

Dia di San Juan ‘Dera Gay’

Den e temponan prome cu aña 1900, e Arubiano tabata biba di entre otro loke nan tabata planta den nan cunucu. E hendenan tabata biba cu poco material di luho. Masha poco hende tabata por a skirbi y lesa. Tur aña e cunukero Arubano tabata celebra fiesta di cosecha riba Dia di San Juan cu deramento di gay y kimamento di sushi di cunucu. ‘Cosecha bon, cosecha malo’.

For di e tempo ey a keda un tradicion Arubano cu tur aña ta celebra Dia di San Juan, cu ta riba 24 di juni, cu a bira un Dia Nacional di Aruba.

Historia ta indica cu e celebracion di Dia di San Juan a origina na sur di Mexico, pa despues a pasa pa Guatemala y otro pais Centro Americano. Y asina el a yega te Venezuela pa despues na Aruba, unda el a keda un tradicion te dia di awe.
E fiesta di San Juan na pais Latino tin hopi di haci cu supersticion. Antes e Indjannan tabata kere den varios dios y spirito. Ta pa esey nan tabata haci nan contento cu ofrenda y fiesta. Principalmente e Indjan tabata celebra fiesta cu baile y musica. Un di e celebracionnan tabata e fiesta di agricultura na ocasion di cosecha. E misioneronan a combina e fiesta di Dia di San Juan cu e fiesta di e Indjan.

Na Aruba ta celebra e fiesta di San Juan, na un manera unico. Nos bieunan ta conta cu aki na Aruba, den pasado, e cunukeronan tabata warda tur e tronconnan di nan cosecha anterior, manera palo di maishi y otro tipo di palo, pa kima riba Dia di San Juan. E tradicion di antes tabata pa cende un candela grandi riba Dia di San Juan. Tin biaha por tin un tocado di grupo cu ta kima su sushi dia 23 di juni, pasobra e mester toca un dia despues pa fiesta di San Juan. E kimamento mes tabata simbolisa purificacion, core cu fucu y pa tin un miho cosecha. Ta celebra e cosecha cu a haya caba y pa e aña nobo di cosecha, cu e cunucu bon drecha cu fiesta di San Juan ‘Dera Gay’. Durante fiesta di San Juan mes tabatin cierto weganan di bulamento di candela, baliamento, cantamento, contamento di storia, leyenda y chasco. E bulado di candela tabata haci esaki pa pret. E mucha homber jong cu kier mustra cu nan si por, ta bula e candela. Nos bieunan tabata bisa ‘muchanan bela’ ta bula candela.

Fiesta di San Juan tabata algo grandi na Aruba. Mayoria di e pueblo no tabata traha parti atardi riba e Dia di San Juan. Ora cu ta cuminsa bira scur, e fiesta ta cuminsa. E tradicion di dera un gay bibo ta algo di e epoca di antaño. Un gay ta simbolisa fertilidad. Na Aruba no tur ora tabata mata e gay.

E doño di cas tabata coba un buraco hancho den tera, mara pia di e gay chikito y tabata hinca e gay den e buraco y tabata tapa e buraco cu un calbas. Den e calbas tabata traha buraco fini pa e gay no sofoca. E calbas tabata hol y asina e gay por move su cabes. Awendia no ta permiti pa dera un gay bibo mas.