Nos idioma materno Papiamento, hunto cu nos Himno, Bandera y Escudo, ta forma parti di nos identidad. Papiamento ta un idioma crioyo. Esaki ta un idioma cu ta nace ora cu dos of mas grupo di hende, cu ta papia diferente lenga ta topa cu otro. Nan ta crea un idioma nobo pa por comunica cu otro. Si e idioma nobo aki bira idioma materno, ta yama esaki un idioma crioyo.

Papiamento ta e idioma materno na Aruba, Boneiro y Corsou. Como Papiamento no tabatin un ortografia defini den e prome siglo y mey di su existencia, tur hende tabata skirbi Papiamento manera nan tabata kere cu tabata bon y no di acuerdo cu un of otro regla stipula.

Dia 5 di mei 1976, Gobierno di Teritorio Insular di Aruba a instala un Comision di Ortografia pa formula y recomenda un forma pa skirbi nos idioma Papiamento. Ecomision a traha riba e peticion di Gobierno y a entrega su recomendacionnan na Gobierno di Aruba dia 13 di september 1976.

Dia 21 di mei 2003, Parlamento di Aruba a aproba e Ley di Idioma oficial. Esaki ta encera cu pa prome biaha den historia di Aruba, Papiamento a bira idioma oficial, banda di Hulandes.

Na augustus 2003, Papiamento a drenta enseñansa secundario EPB, MAVO, HAVO klas 1-2-3, VWO klas 1-2-3 y enseñansa avansa profesional EPI y IPA.

Desde aña 2008 e Seccion di Curiculo di Departamento di Enseñansa a traha riba e condicionnan pa introduci Papiamento tambe den Enseñansa Basico.

Na augustus 2012 a introduci e proyecto piloto ‘Proyecto Scol Multilingual (SAM)’ na 3 scol basico, cu Papiamento como idioma di instruccion.

Papiamento como materia a keda sosteni principalmente pa e metodo didactico ‘Cristal’. Durante aña escolar 2015 – 2016, Papiamento a sigui como materia den HAVO y VWO klas 4 y consecuentemente te final pa bira un materia di examen.

Vocabulario Ortografico di Papiamento
Na 2009, pa prome biaha, a publica un lista amplio di palabra: ‘Vocabulario Ortografico di Papiamento’, miho conoci como e Buki Blauw …