Reconocemento Special brinda na un gran Baluarte: Sr Vicente Ras

Tremendo reconocemento special brinda na un gran baluarte Sr. Vicente Ras y su Grupo Sodo y Cuero.

Diadomingo 14 di december 2020, den e studio di grabacion di Canal 22 Aruba, maneha magistralmente pa Sra. Sandra Suarez y produci pa Sr. Ever Croes, a rindi un tremendo y merecido reconocemento na nos gran baluarte di Aruba y di Bario di Brazil, esta Sr. Vicente Ras y su Grupo Sodo y Cuero.

Esaki ta pa su inevaluabel aporte den mundo musical, su exitoso trayectorio y excelente contribucion na nos herencia cultural y tambe su valioso trabao na bienestar y probecho di henter nos comunidad. A efectua e homenahe mereci aki durante di un pregrabacion pa e programa Strea di Fin di Aña y esaki a sosode dilanti di representante di famia, Vicente su grupo y su grupo di Dande. Tambe diferente representante entre otro di grupo cultural Rosea Cultural, otro personahenan di bario, Reinanan Folkore-Cultural y e tremendo Grupo di Aguinaldo Flor di Pasco. A brinda e reconocemento aki na nomber di Departamento di Cultura Aruba, Fundacion Chico Harms y Canal 22. Sra. Alisandra Bryson a traha e obra den estilo di pirografia y su yiu muhe Ivy-Anne Browne, cu ta Chikitin Cultural di Fundacion Bernadina Growell Kock y Fundacion Chico Harms, a haci entrega di esaki na Vicente. Den e mesun rosea por a haya un espacio pa celebra Vicente su 90 aña di edad y a desea su persona tur bendicion y felicitacion di mundo.

A pesar cu nos ta confronta e situacion dificil di e pandemia toch, danki Dios, nos a logra di haci esaki na grandi y celebra creativamente. Nos a celebra su bida hunto cu ne y a desea su persona, hopi aña mas di bida, salud, paz, amor, luz, color, calor, ilusion, sabiduria, perseverancia, energia positivo y bendicion di Dios ricamente y abundantemente. Danki Dios cu na bida nos por a brind’e su merecido reconocemento y sigur mas ainda na un gran baluarte y ser humano, kende cu e Grupo Sodo y Cuero a sa di conkista e curason di henter un pueblo cu su agradabel bos, zonido y melodia. Cu esaki ta keda constata cu e fruta cu a ser sembra den tera fertil cu tanto constancia, dedicacion y disciplina, awe nos por mira su cosecha y henter un pueblo por disfruta di su frutanan por igual. Esaki ta apenas e inicio di cos mas grandi y fascinante dedica na su persona. Danki Vicente pa comparti cu nos tur bo talentonan, pa trece pa nos bo alegria den e notanan di nos folklore, pa regala nos bo sabiduria y pensamento den forma di nos tradicion y mas tanto pa siña nos ‘gusta di otro pero stima y aprecia loke ta di nos’!

A presenta e programa aki riba diamars 15 di december 2020 na Canal 22.
Masha danki na tur cu a haci esaki asina grandi, exitoso y inolvidabel, entre otro Jhon Freddy T. Montoya y Stan Dabian PR di Departamento di Cultura Aruba.

Keda pendiente pa mas relato di potret di henter actividad.