Diseño Oficial Di Nos Bandera

Diseño oficial di Nos Bandera

E comision, hunto cu conseho di ‘Flag Research Institute’ na Boston, a escoge e diseño cu a bira e Bandera oficial di Aruba. Den e reunion interno pa e Conseho Legislativo riba 8 di maart 1976 a dicidi lo siguiente:

Pa stipula e Bandera proponi pa e Comision di Bandera, como e Bandera di Aruba, di cual e discripcion ta:

E Bandera ta rectangular y a escoge e colornan for di “The British Colour Counsil Dictionary of Colour Standards”: geel (BBC no. 113), blauw (BBC no. 196, Larkspur), cora (BCC no. 210) y blanco (BBC no. 1);
E proporsicionnan di e hanchura y largura ta 2:3;
Den e di tres parti mas abou di e Bandera tin 3 banchi horizontal di e colornan geel-blauw-geel cu cual e hanchura ta igual na un-decimo-octavo parti di e hanchura di e Bandera;
Den e parti mas ariba na banda robes tin un strea cora regular di cuatro punta, cu un rand blanco.

Pa determina cu e reglanan en cuanto e uzo di e Bandera di Aruba.

Dia 16 di maart 1976, Parlamento di Aruba den su gran mayoria, a duna aprobacion pa Aruba haya su propio Himno y Bandera. Dia 18 di maart 1976 a hisa e Bandera pa prome biaha den Wilhelmina Stadion y a toca e cantica ‘Aruba Dushi Tera’, como e Himno di Aruba. Desde cu Aruba a haya su Status Aparte riba 1 di januari 1986, esaki ta encera cu Aruba a bira un pais autonomo den Reino Hulandes, e bandera a bira e Bandera di Pais Aruba.

E nificacion di e colornan di Nos Bandera

Color	Simbolisa	Color Anteriormente	Color Awor
Blauw	E lama inmenso cu ta rondona nos isla y nos shelo blauw. E color di fondo di e bandera.	‘Larkspur’	PMS # 279 C
Geel	Geel ta e color di abundancia E palonan y e matanan di Aruba cu ta floria geel manera Kibrahacha, Brazil, Bonchi di Strena, Curahou, Tuturutu y Wanglo; Fuentenan di ingreso di antaño manera e Industria di Oro, di Guamo y di Aloe; Nos industria di butishi y di artesania Indjan di siglonan pasa y e industria di sombre; E industria actual y turismo como fuente di entrada mas importante, mescos cu oro y industria di aloe for di e pasado industrial.	‘Bunting Yellow’	PMS # 109 C
Blanco	Hunto cu e color cora di e strea, e color blanco ta simbolisa e cariño inmenso di cada ciudadano pa cu su isla; E santo sin mancha di e playanan inmenso cu ta rondona e isla; E puresa di curason di e habitantenan cu ta respeta husticia, orden y libertad.	‘Union Jack Red’	PMS # 032 C
Cora	E cariño inmenso di cada ciudadano pa cu su isla; E sanger drama den e historia di Aruba (Rooi Frances); E verf cora cu hopi aña pasa tabata wordo traha na Aruba di e ‘Palo di Brazil’ y di ‘Cochenille’.	‘Blanco’	PMS ‘Blanco Absoluto’

Renobacion y stipulacion di e colornan di e Bandera

Dia 17 di october 2014 a trece combio den e Decreto Nacional di Bandera, Escudo y Himno, AB 1991 no. 101: renobacion y stipulacion di e colornan di e Bandera segun ley: E colornan di e Bandera di Aruba, segun e sistema di codificacion di color di e fabrica ‘Pantone’, atrobe a keda estableci. Mas informacion: Decreto AB 2014 no. 51