Como cu Aruba tabata forma parti di Antia Hulandes, den pasado Aruba tabata uza e Himno di Antia Hulandes.

E actual Himno Nacional di Aruba, ‘Aruba Dushi Tera’, un wals skirbi door di señor Juan Chabaya, (Padu) Lampe (d.f.m.), cu un composicion di señor Rufo Wever (d.f.m.), cu ta data di añanan 1951 y 1952. Den e tempo aki e dos musiconan hopi conoci aki, a compone y graba e ritmo cu un melodia tipico di Aruba. Nan a sinti e necesidad pa compone un piesa cual lo mester expresa amor di nos pueblo pa nos isla y lanta sintimento patriotico di cada persona.

E grupo di musica y canto ‘De Trupialen’, bou direccion di señor Frère Alexius (d.f.m.), a hinca e cancion aki den nan repertorio y asina su popularidad a crece. E cancion ‘Aruba Dushi Tera’ a bira mas popular ora cu na aña 1954, riba iniciativa di señor Frère Alexius, Radio Kelkboom a graba e cantica riba un disco 78 ‘revolution per minute’ (r.p.m.), canta pa ‘De Trupialen’ y compaña riba piano pa señor Padu Lampe.

E cancion ‘Aruba Dushi Tera’ tabata resona na e ocasionnan importante y durante tur ceremonia oficial.

Na aña 1976 e necesidad pa Aruba haya su propio Himno y Bandera a crece y a bin cu un comision pa yega na Nos Himno. Riba 25 di februari 1976, Gobierno a instala un comision pa a haci un recomendacion pa uza ‘Aruba Dushi Tera’ como Nos Himno Nacional y den e ritmo di wals.

E comision a propone pa añadi un ‘couplet’ mas na e cancion ya hopi uza caba, ‘Aruba Dushi Tera’. Cu su inspiracion, señor Hubert (Lio) Booi (d.f.m.), a añadi na e ultimo couplet e frase: “…cu Dios por guia y conserva su amor pa libertad”. Cu e frase aki e ta elogia e gran cordialidad di e pueblo di Aruba y su amor pa libertad. Decreto di Himno Nacional di Aruba.