Aruba tin un sorto di Shoco cu ta unico na mundo. Esaki a wordo oficialmente introduci tambe como un di e simbolonan Nacional di Aruba.

Riba 18 di maart 2012, e dia Nacional di Aruba, e Shoco (Athene Cunicularia Arubensis) a keda oficialmente introduci como simbolo nacional. E Shoco unico aki ta simbolisa sabiduria y inteligencia.
Athene Cunicularia Arubensis ta un sorto di shoco chikito di 18 pa 25 cm largo cu ta activo durante dia y cu ta jaag riba insecto grandi, entre otro tor, tiracochi y otro insecto.

E shoco ta uza un hol chikito den tera pa traha su neishi. Hopi biaha e shoco ta para dilanti entrada di su hol riba un sero di santo of un rama di palo.

Shoco ta un especie di parha autoctono, un sorto cu solamente ta haya na Aruba. Shoco (Athene Cunicularia Arubensis) ta masha popular y ta imprimi riba placa di papel y stampia di Aruba.