Custumber y Tradicion

Adorno:

Tabata traha adorno di Pasco na cas mes. Cu sinta di tur color tabata traha tur clase di adorno pa pega na muraya y colga den cas, esakinan tabata popchi di paña, borda y gehaak. Cortina nobo of di aña pasa tabata sali for di den cashi pa wordo colga.
E muchanan tabata haya trabou di polish e vloer di mosaico of di palo.
Antes nan tabata dorna cas cu kerstboom y tabata cende un bela. E bela tabata simbolisa e luz di nacemento di Hesus y e strea cu ta briya pa e mustra e caminda pa e stal.

Preparacion:

Preparacion pa Pasco tambe tabata encera di baymento di Playa (Oranjestad) pa cumpra paña y sapato nobo pa bisti Dia di Pasco. Na radio e canticanan bunita di Pasco di grupo tipico y folklorico tabata zona. Awendia ta toca musica di Gaita y Aguinaldo mas tanto.

Pa e Dia di Pasco, varios bes e mucha hombernan cu tabata namora, tabata prepara pa pidi man di e mosa (e mucha muchenan) di nan soño, despues di misa di Pasco. Serenata di Pasco tabata waya den tur skina. E mucha homber hoben tabata prepara nan cancion di Pasco pa canta pa e galiña y un trio tabata bin pa siña e piesa. Tabata rek tambu pa toca y tabata traha tur clase di cantica.

Baymento di misa:

Pa hopi hende e celebracion di Pasco ta un celebracion religioso y ta cuminsa cu baymento di misa di Aurora for di dia 16 di december te cu dia 24 di december, den ora di mainta, Bispo di Pasco. Riba Bispo di Pasco hopi hende tabata gusta bay misa di 12 or di anochi. For di 10 or di anochi caba, mayoria hende ta bay misa pa sigura un luga di sinta den misa. Door di bay misa, ta haya e goso y ta sinti e amor cu nos ta celebra cu e nacemento di dushi Niño Hesus. Despues di misa ta bay bishita bisiña, famia y tambe henter famia ta bay cerca madushi y padushi.

Aña Nobo:

Den tur e fiestamento di Pasco, ta prepara tambe pa Aña Nobo. Ta celebra Aña Nobo cu musica y hopi cuminda manera sopi di bestia chikito y tambe stoba di bestia chikito. Hunto cu esaki un pida ‘boyo’, traha di maishi rabo, cual tabata un tradicion bieu. Ta ofrece esaki na e bishitantenan cu un bon deseo na tur esnan cu yega na e cas.

E Arubiano tabata gusta cuminda sala y tabata un tradicion grandi durante cambio di aña cu mester tin carnisa of suls y un sabroso cos di pasa boca pa bishita inespera. E fiesta ta sigui te den oranan di mainta. Un di e bebidanan cu ta ofrece durante Pasco y Aña Nobo tabata chuculati di pinda, cu tabata sirbi esaki cayente y no tin chuculati den dje.

Bispo di Pasco di antes, mas shen di aña pasa, mas of menos 11 or y mey di anochi, mey ora prome cu mey anochi, den e hogar Arubano na mas of menos e ora ey, e mama ta bariendo e cas, maske cu e tabata limpi caba. Di e tempo ey caba tabatin e tradicion di sencia e cas pa core cu mal spirito of fucu di e aña bieu. Tambe tabata habri tur bentana y porta pa mas of menos dos minuut prome cu mey anochi y cada miembro di famia tabata bay para pafo dilanti porta di cas pa ricibi Aña Nobo. Ora mainta habri e dia ta sigui mescos cu Pasco ya cu e hendenan tabata lanta tempran y prepara pa bay misa. Despues fiesta tabata cuminsa bishita otro. E diferencia grandi cu Pasco tabata compaña e actividad cu bebida y baliamento.

Dande:

Mientras cu e hendenan ta come y bebe pa celebra Aña Nobo, e musiconan tabata pasa bishita bisiña cu nan instrumentonan musical pa ofrece e ‘Dande’ tradicional, di cual tabata un bendicion di solamente un cancion pa e ocasion ey. Nan tabata pasa di cas pa cas pa asina ofrece nan miho deseonan pa e aña nobo, cantando ‘Dande’. Naturalmente nan ta bon ricibi y e hendenan tabata tira placa (cen, placa gay, sepelin, depchi, dies placa, un patin, etc.) den e sombre. Antes e hendenan tabata tira boyo tambe den sombre, awendia nan ta tira placa so.

E musiconan tabata sinta come y bebe algo despues cu nan caba di canta nan Dande. E custumber aki nos ta yama ‘piki punta’ (di punta pa punta). E gruponan di musico cu tabata pasa toca Dande, ta cuminsa toca despues di tiro di Aña Nobo y ta sigui cu esaki te cu dia 6 di januari, cu ta ‘Dia di Tres Rey’.