Bispo di Aña Nobo

Den tur e fiestamento aki ta prepara pa aña nobo. Ta celebra aña nobo cu musica y hopi cuminda manera sopi di bestia chikito y tambe stoba di bestia chikito. Hunto cu esaki un pida ‘boyo’, traha di maishi rabo, cual tabata un tradicion bieu. Ta ofrece esaki na e bishitantenan cu un bon deseo na tur esnan cu yegana e cas.

E Arubiano tabata gusta cuminda sala y tabata un tradicion grandi durante cambio di aña cu mester tin carnisa of suls y un sabroso cos di pasa boca pa bishita inespera. p.e. E fiesta ta sigui te den oranan di mainta. Un di e bebidanan cu ta ofrece durante Pasco y Aña Nobo ta chuculat’i pinda, cu tabata sirbi cayente y no tin chuculati den dje. Imagina bo cu ta 1883, cien aña pasa, mas of menos 11:30 p.m., mey ora prome cu mey anochi, den e hogar Arubano na mas of menos e ora ey, e mama lo ta bariendo e cas, maske cu e tabata limpi caba.

Tabata sencia e cas pa core cu mal spirito di e aña bieu. Tambe tabata habri tur bentana y porta pa mas of menos dos minuut prome cu mey anochi y cada miembro di famia ta bay para pafo dilanti porta di cas pa ricibi aña nobo. Ora mainta habri e dia ta sigui mescos cu Pasco ya cu e hendenan tabata lanta tempran y prepara pa bay misa. Despues fiesta ta cuminsa y tabata cuminsa bishita otro. E diferencia grandi cu Pasco tabata cu tabata compaña e actividad cu bebida y bailamento.