Di e forma aki Aruba por duna Gilberto François Croes su homenahe y asina un y tur por keda recorda su lucha pa a logra Aruba su Status Aparte. E lucha aki a marca historia di Aruba.
Gilberto François Croes, cariñosamente yama Betico, a nace na Aruba dia 25 di januari 1938 y a fayece dia 26 di november 1986. E tabata casa cu señora Glenda Croes y e tabata tata di 4 yiu.
Despues di su carera escolar, Betico a sigui su estudio na Hulanda na unda el a logra su diploma di maestro di scol. Durante su estadia na Hulanda, e tabata masha activo mes den diferente organisacion Antiyano. Ora cu Betico a regresa Aruba, el a bay traha como maestro na Colegio San Hose na Santa Cruz y despues di a logra su diploma “LO Spaans y Handelskennis” el a bay traha na Colegio San Antonio.
Na Aruba tambe, mescos cu na Hulanda, Betico tabata masha activo riba tereno deportivo, musical, cultural y social. Na aña 1967 el a drenta arena politico como un candidato riba lista di e partido politico, “Arubaanse Volks Partij (AVP) y e mesun aña a eligie como miembro di Conseho Insular di Aruba. El a fungi como diputado di educacion. Despues cu a surgi un diferencia di opinion fundamental den AVP, Betico a funda dia 9 di februari 1971, su mesun partido politico, Movimento Electoral di Pueblo (MEP), di cual e tabata e lider. Betico den su carera politico, nunca a acepta ningun puesto politico, sino solamente a fungi como Consehero General di Gobierno. Desde e tempo ey, Betico a hiba un lucha pa Aruba logra su Status Aparte. Na mei 1985, Parlamento Hulandes a acorda pa haci cambio den Statuut pa asina Aruba drenta su Status Aparte dia prome di januari 1986. Cu esaki Hulanda a mara na condicionnan bastante stricto. Esun mas stricto tabata cu Aruba por haya su Status Aparte na 1986, pero ta mara na un independencia den 10 aña. Betico a acepta e reto aki y tabata di opinion cu despues por haci cambio den esaki.
Desafortunadamente Betico no a haya e oportunidad pa gosa di e Status Aparte di Aruba, despues cu el a haci tanto esfuerso, lucha y sacrificio pa logra esaki. Dia 31 di december 1985, pa 9 or di anochi, solamente algun ora prome cu Aruba a bira un pais autonomo den Reino, Betico a sufri un accidente di trafico cu a laga su persona gravemente herida. Despues di a keda 11 luna den coma, Betico a fayece na Hulanda riba 26 di november 1986. E pueblo Arubano nunca por lubida e palabranan historico di e gran homber aki: “Si mi cay na caminda, gara e bandera y sigui cu e lucha.”
Danki na e lucha di Betico, awe Aruba ta un pais autonomo den Reino, cu su propio Gobierno, su propio bandera, su himno, su propio escudo y moneda.
Fundacion Betico Croes, cu ayudo di pueblo, a honra e memoria di Betico y a pone su estatua riba Plaza Libertador Betico Croes, na Vondellaan. Riba e Plaza, aki tur aña, riba 25 di januari, Gobierno di Aruba tin un acto protocolar pa recorda e personahe aki cu a nifica hopi pa Aruba.
Ta pa e motibo aki tambe Parlamento y Gobierno di Aruba a proclama Betico, como e personahe di siglo.
Adres:
John F. Kennedy Education Center
Stadionweg 37, Oranjestad, Aruba
Telefon:
(297) 582-2185
E-mail:
info@cultura.aw
Oranan di Oficina:
Dialuna – Diabierna
7:30 AM – 4:30 PM