Gang di Arte Aruba 2023

Oranjestad.

Dia 21 di juli 2023, na Centro di Bario Dakota, a tuma luga e grandioso final di e Competencia Hubenil Gang di Art Aruba cu a bay den combinacion cu e proyecto Hubenil Dream, Dare, Do.

Un total di 12 grupo consisti pa 8 integrante pa cada grupo, a participa pa e premiacion final, na unda nan mester a yega na un obra propio y creativo cu e tema central “Cultura”.

Durante di un siman largo e hobennan a pasa den un trayecto di preparacion, na unda nan a haya diferente experiencia di arte den forma multidisciplinario.

Durante di e presentacion final tabata tin presentacion di obranan di arte visual, musica, teatro, canto y baile.

E gruponan a sobresali grandemente pa nan calidad y presentacion, na unda un cuerpo di hurado a selecta e 3 grupo ganado segun secuencia bao e siguiente criteria: Presentacion den su totalidad, vestuario, trabao den ekipo, coordinacion, comunicacion, impacto, energia, alegria y creatividad.

Di 2 finalista a bay pa e grupo di canto, modalidad rap: “Free The World”

Prome finalista a bay pa e grupo di baile: “Superstars”

Y e ganado abosulto a bay pa e grupo di baile y teatro: “Street Soldiers”, kende lo representa Aruba den un intercambio na aña 2024.

Durante di e anochi fascinante aki, e grupo invitado di honor di Bonaire: “ACE Bonaire”, bao direccion di Segnie Bernadina, a haci un maraviyoso presentacion na unda nan a trece parti di e folklore y tradicion, den un obra completamente educativo cu combinacion di Poesia, teatro, musica y baile, como parti di e acuerdo y intercambio cu nos ruman isla Bonaire.

Tambe nan participacion ta ser haci pa fortalece e lasonan di union y engrandece nos participacion como parti di e intercambio cu nos proyecto GDA Aruba cu e prome edicion di Gang di Arte Bonaire.

Departamento di cultura Aruba ta gradici tur maestro invitadonan especial di e proyecto “Dream, Dare, Do”; di e Fundacion Tur cos ta posibel, na Freddy Tromp di Popcorn Dancers, na cuerpo di hurado, na ACE Bonaire, na tur Hoben y famia pa nan tremendo participacion.

Keda pendiente pa e edicion number 17 y e lansamento oficial di e fechanan y tema nobo pa aña 2024. “Sin Limite”