Departamento di Cultura Aruba ta resorta bou auspicio di Ministerio di Cultura y tin como meta general pa conscientisa e pueblo di Aruba cu expresion y diversidad cultural ta elementonan esencial den desaroyo di un pais.

Vision

DCA ta aspira pa un desaroyo cultural caminda expresion cultural ta florece y agrega balor na bida di e ser humano. Alavez pa tin un sociedad inclusivo caminda diversidad cultural ta ser aprecia y celebra. DCA kier ta e forsa impulsor tras di e crecemento artistico, intercambionan cultural y fortalecemento di e comunidad, cu e meta pa laga atras un herencia rico na cultura y creatividad pa e generacionnan cu ta bin despues.

Mision

DCA ta cuida, stimula y haci cultura disponibel pa tur comunidad. Ta dedica na preserva y fomenta nos herencia cultural, stimula creatividad y reforsa nos identidad cultural, contribuyendo na ‘Nation Building’. Pa medio di colaboracion, educacion y inovacion, ta boga pa crea un comunidad cultural vibrante cu ta inspira y uni tur hende.