Simbolo Nacional

Home
/
Nos Himno

Nos Himno

Como cu Aruba tabata forma parti di Antia Hulandes, den pasado Aruba tabata uza e Himno di Antia Hulandes.

E actual Himno Nacional di Aruba, ‘Aruba Dushi Tera’, un wals skirbi door di señor Juan Chabaya, (Padu) Lampe (d.f.m.), cu un composicion di señor Rufo Wever (d.f.m.), cu ta data di añanan 1951 y 1952. Den e tempo aki e dos musiconan hopi conoci aki, a compone y graba e ritmo cu un melodia tipico di Aruba. Nan a sinti e necesidad pa compone un piesa cual lo mester expresa amor di nos pueblo pa nos isla y lanta sintimento patriotico di cada persona.

E grupo di musica y canto ‘De Trupialen’, bou direccion di señor Frère Alexius (d.f.m.), a hinca e cancion aki den nan repertorio y asina su popularidad a crece. E cancion ‘Aruba Dushi Tera’ a bira mas popular ora cu na aña 1954, riba iniciativa di señor Frère Alexius, Radio Kelkboom a graba e cantica riba un disco 78 ‘revolution per minute’ (r.p.m.), canta pa ‘De Trupialen’ y compaña riba piano pa señor Padu Lampe.

E cancion ‘Aruba Dushi Tera’ tabata resona na e ocasionnan importante y durante tur ceremonia oficial.

Na aña 1976 e necesidad pa Aruba haya su propio Himno y Bandera a crece y a bin cu un comision pa yega na Nos Himno. Riba 25 di februari 1976, Gobierno a instala un comision pa a haci un recomendacion pa uza ‘Aruba Dushi Tera’ como Nos Himno Nacional y den e ritmo di wals.

E comision a propone pa añadi un ‘couplet’ mas na e cancion ya hopi uza caba, ‘Aruba Dushi Tera’. Cu su inspiracion, señor Hubert (Lio) Booi (d.f.m.), a añadi na e ultimo couplet e frase: “…cu Dios por guia y conserva su amor pa libertad”. Cu e frase aki e ta elogia e gran cordialidad di e pueblo di Aruba y su amor pa libertad. Decreto di Himno Nacional di Aruba.

Dia 16 di maart 1976, Gobierno di Teritorio Insular di Aruba, a aproba ‘Aruba Dushi Tera’, como e Himno oficial di Aruba.

Riba e anochi di 18 maart 1976, durante un manifestacion den Stadion di Wilhelmina na Dakota (awor Stadion Guillermo Prospero Trinidad), organisa pa Gobierno Insular di Aruba, a proclama ‘Aruba Dushi Tera’ como e Himno Nacional di Aruba. Pa di prome biaha ‘Aruba Dushi Tera’ a resona como Himno oficial di Aruba. E Himno a keda canta door di e coro di señora Maybeline Arends Croes, riba acompañamento di Orkesta Filharmonico di Aruba, bou di guia di e musico conoci señor Hesus Maria (Joy) Kock.

Lesa mas

1 2

Dia 18 di maart 1976 a bira e fecha mas importante den historia di Aruba. E ta e dia cu a escoge pa celebra Dia di Himno y Bandera di Aruba, un Dia Nacional di Aruba, pasobra durante Mesa Rondo na Hulanda, riba e fecha ey na aña 1948, pa prome biaha a entrega un mocion na Su Mahestad Reina Juliana (d.f.m.), cu ta boga pa autodeterminacion di e pueblo Arubano. E delegacion Arubano tabata bou di liderazgo di señor Shon A. Eman (d.f.m.) y 2147 Arubiano a firma e peticion aki.

Protocol pa uzo di nos Himno

Ora cu ta canta Nos Himno ta sigui e siguiente protocol:

Tur hende ta para recht cu su mannan cada banda di su curpa;
Ta wak den e direccion di e Bandera, sino den direccion di e cantante of un mandatario presente;
No ta permiti pa hende homber tin algo bisti riba nan cabes. Hende muhe si por keda cu nan sombre bisti;
Durante di e Himno, tur hende ta para keto y no ta papia;
Ora cu e Himno caba di ser keda presenta no ta bati man.