Na aña 2007 a introduci e proyecto di Gang di Arte (GdA) pa prome biaha na Aruba, cu ta un proyecto cu a inicia na Hulanda como ‘Kunstbende’. A cuminsa cu un simpel competencia na unda e hobennan entre 13 pa 21 aña ta yega y presenta den e competencia riba un anochi final so, pa asina por a saca e finalistanan y ganado di e prome edicion.

Gang di Arte ta un proyecto hubenil artistico den cual nos hobennan na diferente forma di expresion artistico, ta demostra nan talento y pasion pa arte y cultura en general.

Mirando e interes y e importancia di e proyecto aki na aña 2008, di cua Gobierno di Aruba a declara como Aña di Cultura, a introduci un sistema nobo pa sigui desaroya e competencia aki. Aki a opta pa nombra e proyecto ‘Festival Intercolegial di Expresion, Talento y Creatividad’. E participantenan ta haya guia pa medio di tayer den diferente disciplina.

E idea a continua y e hobennan por a competi riba un tema, cual tur aña tabata diferente. Esaki ta riba varios disciplina di arte, manera poesia, teatro, baile, Disc Jockey (DJ), arte visual, moda, musica, canto, etc.