Historia – Historia DCA despues di Status Aparte

Na aña 2002 Instituto di Cultura a haya un transformacion despues cu a tene un Cumbre Nacional Cultural. Aki e participantenan a trece algun punto dilanti pa revision di e maneho di cultura. A base di esaki Minister di Cultura, señor Ramon Lee, a encarga señora Ruby Eckmeyer pa skirbi un maneho di cultura pa Aruba y pa yuda reorganisa Instituto di Cultura.

Na aña 2006 Gobierno di Aruba a aproba e prome plan nacional pa un Maneho Integral di Cultura y dia 1 di december 2007 a institui oficialmente Departamento di Cultura Aruba na luga di Instituto di Cultura y a apunta señora Eckmeyer como director.

Desde aña 2007 a trece cambio den e maneho di Departamento di Cultura Aruba un biaha mas.

E meta principal ta pa conscientisa e pueblo cu expresion y diversidad cultural ta elementonan esencial den desaroyo di un pais. Tambe lo haci investigacion y documentacion di e herencia cultural di nos pais.

Desde 2012 DCA ta bou direccion di Director, señor drs. Siegfried Dumfries. A scoge pa un acercamento integral di e maneho di DCA. Un acercamento for di e spirito di traha conhuntamente y cu propio forsa y talento pa traha brugnan interdepartamental y pa Aruba expone su mes internacionalmente. Asina Aruba cu su escala chikito ta bira un forsa grandi.

Logo Departamento di Cultura Aruba

• E forma basico di e diseño ta un gota di awa; esaki ta simbolisa, manera awa, cu nos cultura ta fuente di bida;
• E multicolor den e diseño ta forma un C di cultura cu ta caba den un punta, cual ta indica cu cultura ta dinamico y den desaroyo continuo;
• E colornan ta representa e diferente nacionnan bibando den nos pais haciendo nos sociedad uno multicultural;
• E banchinan blanco ta representa pureza. E pureza cu nos pensamento, intencion y accion mester tin pa un miho Aruba.